Jak zrobić swojski wuszt ?

   Nojważniejsze, zanim kupicie mięso na tyn wuszt, to musicie sie zaopatrzyć w szczewa,
No i spaczeć sie maszyny do pomelanio mięsa i nabicio w te szczewa. Bo ło tym sie czynsto zapomino, tak jak ło cosku do żuru. 

   Dobra, już niy bamonca ino jadymy dali. Według mojego przepisu, to trza kupić:

ok. 5 kg boczku świyrzego ( może być tusty )

ok. 2,5 kg chudego mięsa wieprzowego ( nojlepi z łopatki )

ok. 1 kg wołowiny ( polecom pręga wołowo )


   Mięso by my mieli, teraz prziprawy:

tytka mielony gałki muszkatołowy

pieprz corny mielony

cosnek

sol

majeranek

cukier

   Mięso, dziyń pryndzy cza pokroć na take koncki, wielkości paczki zapałek i lekko zasolić.

   Cało reszta roboty mogymy zaczonć łod rana. Szczewa cza zamoczyć w letni wodzie (ino niy gorki ). Te mięso co było dziyń wcześni zasolone melomy, mięso z łopatki na wielkich łockach, boczek na myńszych a pręga na całkym małych.

   Pomelane mięso, nojlepi w jaki misce, prziprawiomy.

   Gałki muszkatołowy dowomy ino troszycka, tak poł łyżecki. Pieprz, cosnek i majeranek kożdy dowo według swojego smaku, a cukru tyż ino troszka, tak z jedna łyżecka.

   Soli dowomy tyla, żeby boło dobre. Moga ino pedzieć, że troszka idzie przesolić, bo to potym sie straci. Żeby sie lepi miyszało, mogymy naloć poł szolki wody.

   Tak prziprawiono i dobrze wymiyszano masa, nabijomy do szczewow. Łokryncomy, wiyszomy na jakiś kij ( może być sztyl ze mietły ) i tak niych sie to wisi ze 3-4 godziny aż trocha łobeschnie. Potym wyndzymy, ale ło ty technice niy byda pisoł, bo tak richtig, to jo by mog książka na tyn tymat napisać. 

   Życa smacznego.

P.S.
Flaszka łotwiyromy dopiyro po robocie, bo smak sie zepsujecie.